पत्रकार र सञ्चारमाध्यम माथिको आक्रमण अक्षम्य अपराध, सुरक्षाको प्रत्याभुति दिलाउन माग
Surya Baral
चितवन/
चतवनका पत्रकारले पछिल्लो समय पत्रकार र सञ्चार माध्यम माथि भएका आक्रमणको विरोध गर्दै सुरक्षाको प्रत्याभुति दिलाउन सरकारसँग माग गरेका छन् । आज (मंगलबार) नेपाल पत्रकार महासंघ चितवन शाखाले ‘पत्रकार सुरेश रजकको हत्या र सञ्चार माध्यमहरुमा भएको ज्यादती विरुद्ध’ आयोजना गरेको अन्तरक्रिया कार्यक्रममा बोल्ने पत्रकारहरुले आन्दोलनका नाममा मिडिया र मिडियाकर्मी माथि हुने आक्रमणलाई रोक्न माग गरेका हुन् ।
नेपाल पत्रकार महासंघ बागमती प्रदेश महासचिव राधेश्याम खतिवडाले आन्दोलन सफल बनाउने नाममा मिडियालाई हतोत्साहित बनाउन आन्दोलनकारीले पत्रकारलाई निशानामा राख्ने गरेको भन्दै यस्तो अवस्था अन्त्य हुनुपर्ने बताउनुभयो । ‘संविधानले पत्रकारको सुरक्षाको ग्यारेन्टी गरेको छ,’ उहाँले भन्नुभयो ‘पत्रकारको सुरक्षाका लागि राज्य थप सम्बेदनशिल हुनुप¥यो ।’
पत्रकार महासंच चितवनका पूर्व अध्यक्ष कृष्ण गिरीले आगामी दिनमा आन्दोलनका नाममा पत्रकार सुरेश रजकले जस्तै ज्यान गुमाउने अवस्था आउन नदिन सचेत बन्नुपर्ने बताउनुभयो । चैत १५ गते भएको घटनाको सत्यतथ्य छानविन हुनुपर्ने भन्दै लोकतन्त्र र गणतन्त्रको रक्षाका लागि रजकको रगत बगेको उल्लेख गर्नुभयो ।
पत्रकार महासंघ चितवनका अध्यक्ष वसन्तराज पराजुलीले पत्रकार रजतको हत्या र मिडिया माथिको आक्रमण निन्दनिय कार्य भएको भन्दै पत्रकारले आफ्नो सुरक्षालाई पहिलो प्राथमिकता दिनुपर्ने बताउनुभयो । उहाँले महासंघले पत्रकारको सुरक्षाका लागि आवश्यक तालिमका लागि सहजिकरण गर्ने बताउनुभयो ।
छलफलमा प्रेस सेन्टर नेपालकी केन्द्रीय उपाध्यक्ष शान्ता अधिकारीले पत्रकार सधैँ जोखिममा रहेको भन्दै एकतावद्ध भएर अघि बढ्नुपर्ने बताउनुभयो । प्रेस चौतारी नेपालकी बागमती प्रदेश इन्चार्ज प्रतिमा सिलवालले फिल्डदेखि कार्यस्थलसम्म पत्रकार जोखिममा रहेको बताउनुभयो । ‘जिल्लामा रहेका पत्रकारलाई समाचार लेखेकै आधारमा अनावश्यक दबाव दिने प्रचलन छ,’उहाँले भन्नुभयो ‘समाचार लेखेर सुरक्षित महशुस हुने वातावरण बन्नुप¥यो ।’
प्रेस युनियन चितवनका अध्यक्ष अनिल ढकालले पत्रकार माथिको आक्रमण दोहोरिनु चिन्ताको विषय रहेको भन्दै पत्रकार असुरक्षित हुने विषय खोज्न र समिक्षा गर्न आवश्यक रहेको बताउनुभयो । अन्तरक्रिया कार्यक्रममा बोल्ने अधिकांश पत्रकारले पहिला आफू सुरक्षित रहने र त्यसपछि मात्रै रिपोर्टिङ गर्नुपर्नेमा जोड दिएका थिए । अन्तरक्रिया कार्यक्रममा पत्रकार नवराज ढकाल, दीपेन्द्र अधिकारी, कृष्णप्रसाद खनाल, सुर्यप्रकाश कँडेल, कृष्ण आचार्य, शान्ता अधिकारी, सुर्यप्रसाद अधिकारी, सरिता पौडेल, सुर्य बराल क्षितिज, सुनिल पराजुली, श्याम विश्वकर्मा, लगायतले आफ्नो धारणा व्यक्त गर्नुभएको थियो ।
