फेन्सी व्यवसायी संघको निर्वाचन पौष ८ मा, अध्यक्षमा राम प्रसाद पौडेलले गरे उम्मेद्बारी घोषणा।
Surya Baral
फेन्सी व्यावसायी संघ चितवनको निर्वाचन यहि पौष ८ गते उधोग बाणिज्य संघ चितवनको सभाहलमा हुने भएको छ। संघको ३८ औ साधारणसभा तथा १९ औ अधिवेशन हुन लागेको हो।
अधिवेशनमा सस्थापन पक्षबाट रामप्रसाद पौडेलले उम्मेद्बारी दिएका छन् भने गत निर्वाचनमा पराजित यम प्रसाद घिमिरेले समेत उम्मेद्बारी दिएका छन्। केही दिनयता ब्यबसायीहरु दुई प्यानल नै बनाई निर्वाचन आफ्नो पक्षमा पार्न दुबै उमेदवार ब्यबसायीको पसल पसलमा चहार्दै निर्वाचनको रौनक ह्वात्तै बढेको छ।
यसैबीच, रामप्रसाद पौडेलले आफ्नो घोषणा पत्र सार्बजनिक गरेका छन जो यसप्रकार छ।
महोदय,
यो विशेष अवसरमा यहाँहरूको साथ, समर्थन, र हौसलाले मलाई अत्यन्तै उत्साहित बनाएको छ। म, राम प्रसाद पौडेल, चितवन जिल्ला फेन्सी व्यवसायी संघको अध्यक्ष पदका लागि उम्मेदवारी घोषणा गर्न चाहन्छु।
हामी सबै व्यवसायीहरू एकजुट भएर आफ्नो व्यवसायलाई समृद्ध बनाउने सपना देखिरहेका छौँ। तर, आजको समयले हामीलाई नयाँ चुनौतीहरूको सामना गर्न बाध्य बनाएको छ। आर्थिक मन्दी, मनोमानी घर भाडा, पार्किङ व्यवस्थापनको अभाव, करसम्बन्धी समस्याहरू, र व्यवसायीहरूको असुरक्षा जस्ता समस्याहरू हाम्रो व्यवसायीक जीवनका मुख्य चुनौतीहरू हुन्।
यस पृष्ठभूमिमा, मैले व्यवसायीहरूको हकहितको रक्षा गर्न, संघलाई थप सशक्त बनाउन, र व्यवस्थित तथा सुरक्षित व्यवसायीक वातावरण निर्माण गर्न उम्मेदवारी दिन निर्णय गरेको हुँ।
मेरो प्रतिबद्धताहरू
१. समन्वयात्मक भूमिका निर्वाह:
चितवनका फेन्सी व्यवसायीहरूलाई एकीकृत गर्दै स्थानीय निकाय, टोल विकास संस्था, र बजार व्यवस्थापन समितिहरूसँग सहकार्य गरेर सहायक वातावरण निर्माण गर्ने मेरो पहिलो प्राथमिकता हुनेछ।
२. व्यवस्थित बजार व्यवस्थापन:
घर भाडा, पार्किङ, र फोहोर व्यवस्थापनका समस्या समाधानका लागि सम्बन्धित निकायसँग सहकार्य गरी व्यवस्थित बजार निर्माण गर्नेछु।
३. दैवीप्रकोप र राहत कोष निर्माण:
व्यवसायीहरूको धनजन क्षतिका लागि राहत कोष निर्माण गर्दै व्यवसायीक बीमाको प्रभावकारी कार्यान्वयन गर्नेछु।
४. वैज्ञानिक घर भाडा प्रणाली लागू:
घर भाडामा हुने मनोमानी रोक्न वैज्ञानिक घर भाडा प्रणाली लागू गर्न ठोस पहल गर्ने मेरो प्रतिबद्धता छ।
५. युवाहरूलाई व्यवसायीक प्रशिक्षण:
युवाहरूलाई व्यवसायीक क्षेत्रमा प्रोत्साहित गर्न तालिम कार्यक्रम सञ्चालन गरी व्यवसायमा उनीहरूको सहभागिता बढाउने योजना मसँग छ।
६. करसम्बन्धी समस्या समाधान:
व्यवसाय कर, घरभाडा कर, र विज्ञापन करका समस्याहरूलाई नीतिगत तहमा समाधान गर्न सम्बन्धित निकायहरूसँग समन्वय गर्नेछु।
७. डिजिटल संघ व्यवस्थापन:
नयाँ सदस्यता, नविकरण प्रक्रिया, र सूचना प्रवाहलाई पूर्णतः डिजिटल बनाउने र संघको वेबसाइट तथा सामाजिक सञ्जाललाई अद्यावधिक राख्नेछु।
८. उत्कृष्ट व्यवसायी सम्मान:
प्रत्येक वर्षको साधारण सभामा उत्कृष्ट व्यवसायीलाई सम्मान र पुरस्कार प्रदान गरेर व्यवसायीक क्षेत्रमा प्रेरणा फैलाउनेछु।
९. सस्तो ऋणको व्यवस्था:
फेन्सी व्यवसायीहरूलाई न्यून ब्याजदरमा ऋण उपलब्ध गराउन फेन्सी साकोससँग सहकार्य गर्नेछु।
मेरो अपिल
आदरणीय व्यवसायी दाजुभाइ तथा दिदीबहिनीहरू,
म एक व्यवसायीका रूपमा यहाँहरूको दुःख, पीडा, र संघर्षलाई नजिकबाट बुझेको छु। संघलाई पारदर्शी, प्रभावकारी, र व्यवसायीमित्र बनाउन म सम्पूर्ण रूपमा प्रतिबद्ध छु। यसपटक मलाई तपाईंहरूको अमूल्य मत, समर्थन, र विश्वास प्रदान गर्न आग्रह गर्दछु।
हाम्रो एकताको बलले मात्र संघलाई बलियो बनाउनेछ, समस्याहरूको समाधान गर्नेछ, र नयाँ सम्भावनाहरू सिर्जना गर्नेछ।
सद्भावना र सहयोगका लागि यहाँहरू सबैप्रति हार्दिक आभार व्यक्त गर्दछु।
