ट्रम्पलाई मार्ने षड्यन्त्र गरेको आरोपमा पाकिस्तानी नागरिक पक्राउ !

एजेन्सी

 |  प्रकासित मिति : २३ श्रावण २०८१, बुधबार ११:४९

वासिङ्टन डीसी/पूर्व राष्ट्रपति डोनाल्ड ट्रम्प र केही राजनीतिज्ञको हत्याको षड्यन्त्र गरेको आरोपमा इरानसँग सम्बन्ध रहेको एक पाकिस्तानी नागरिकलाई पक्राउ गरिएको छ । एफबीआईका निर्देशक क्रिस्टोफर रेले हत्याको षड्यन्त्रलाई इरानसँग जोडेका छन् ।

४६ वर्षीय आसिफ मर्चेन्टलाई अमेरिकाका प्रख्यात राजनीतिज्ञको हत्या गर्न न्युयोर्कमा हिटम्यान हायर गर्ने प्रयास गरेको आरोप लागेको छ । रिपब्लिकन उम्मेदवारको हत्याको षड्यन्त्रमा इरानको संलग्नता पत्ता लागेपछि अधिकारीहरूले जुनमा ट्रम्पको सुरक्षा बढाएका थिए ।

कुनै राजनीतिज्ञ वा अमेरिकी नागरिकको हत्या गर्ने विदेशी षड्यन्त्र आफ्नो राष्ट्रिय सुरक्षाको लागि खतरा भएको र यसको सामना गर्न एफबीआईले आफ्नो पूरा स्रोत प्रयोग गर्ने मंगलबार एफबीआई निर्देशकले बताएका थिए । आसिफ मर्चेन्टलाई जुलाईमा पक्राउ गरिएको थियो । अहिले उनलाई न्यूयोर्कमा राखिएको छ ।