उत्तर कोरियाद्वारा पानीमुनि प्रहार गर्न सक्ने परमाणु हतियार सिस्टमको परीक्षण
एजेन्सी
प्योङयाङ/अमेरिका, दक्षिण कोरिया र जापानले गरेको संयुक्त सैन्य अभ्यासको प्रतिक्रिया स्वरुप उत्तर कोरियाले पानीमुनि प्रहार गर्न सक्ने परमाणु हतियार सिस्टमको परीक्षण गरेको त्यहाँको सञ्चार माध्यमले जनाएको छ ।
‘हेइल–५–२३’ नाम दिइएको उक्त परमाणु हतियारलाई उत्तर कोरियाले आफ्नो पूर्वी तटीय क्षेत्रमा परीक्षण गरेको हो । उत्तर कोरियाले यसअघि पनि यस्तै परीक्षण सम्पन्न गरिसकेको छ ।
कोरियाली प्रायद्वीपमा कुनै पनि बेला युद्ध सुरु हुन सक्ने बताउँदै उत्तर कोरियाले पछिल्लो समय आफ्नो सैन्य शक्ति विकास गरिरहेको जनाएको छ । यही हप्ता उत्तर कोरियाका शीर्ष नेता किम जोङ उनले दक्षिण कोरियासँग ‘एकीकरण’ को उद्देश्य समाप्त भएको बताउँदै दक्षिण कोरियालाई ‘प्रधान शत्रु’ घोषणा गरेका थिए ।
गत सेप्टेम्बरमा उत्तर कोरियाले परमाणु हतियार प्रहार गर्न सक्ने पनडुब्बीको परीक्षण गरेको दाबी गरेको थियो । त्यसअघि सन् २०२३ को मार्चमा उसले पानीमुनि प्रहार गर्न सक्ने परमाणु हतियारसहितको मानवरहित ‘हेइल सिस्टम’को परीक्षण गरेको पनि जनाएको थियो ।
