सेन्ट्रल कलेज टि–१० लिगको उपाधि आरसीसीलाई
Surya Baral
चितवन/नारायणगढस्थित क्याम्पाचौरमा भएको सेन्ट्रल कलेज टि–१० क्रिकेट लिगको उपाधि रत्ननगर क्रिकेट क्लव (आरसीसी)ले जितेको छ । फाइनल खेल वर्षाले प्रभावित भएपछि लिगको शीर्ष स्थानमा रहेको आधारमा आरसीसीले उपाधि जितेको हो । लिग चरणमा आरसीसीको ८ अंक रहेको थियो । फाइनलमा प्रतिस्पर्धा गर्न नपाएपछि ड्रागन फाइटर्स लिग चरणमा बटुलेको ६ अंकको आधारमा दोस्रो स्थानमा रहँदै ड्रागन उविजेतामा चित्त बुझायो ।
विजेता र उपविजेतालाई सेन्ट्रल कलेजका प्रिन्सिपल तथा प्रमुख अतिथि यज्ञविलास (वाइबी) पौडेलले पुरस्कार प्रदान गरेका थिए । उनीहरुलाई ट्रफी र समान ४० हजार रुपैयाँ पुरस्कार प्रदान गरिएको थियो । फरवार्ड भिजन इभेन्ट म्यानेजमेन्टको आयोजनामा भएको प्रतियोगिता असोज १० गतेदेखि सुरु भएको थियो ।
सो अवसरमा बोल्दै प्रिन्सिपल पौडेलले खेलकुदको क्षेत्रको विकासका लागि सेन्ट्रल कलेजले निरन्तर काम गरिरहने बताउनुभयो । उहाँले कलेजले उच्च शिक्षा अध्ययन गर्न जापान,अष्ट्रेलिया,क्यानडा लगायतका देशमा विद्यार्थी पठाउँदै आएको भन्दै उहाँले कलेज सबै विद्यार्थीको रोजाइ बनेको बताउनुभयो ।
प्रतियोगितामा कुल १० टिमको सहभागिता रहेको थियो । प्रतियोगितामा एक्सपर्ट एजुकेशन एण्ड भिजा सर्भिसेजलगायतका संस्थाले सहयोगी संस्थाको भूमिका निर्वाह गरेका थिए ।
