प्रचण्ड भदौँ ८ गते चितवन आउदै
Surya Baral
चितवन/माओवादी केन्द्रका अध्यक्ष पुष्पकमल दाहाल (प्रचण्ड) भदौँ ८ गते चितवन आउदैहुनुहुन्छ । माडीमा निर्माण सम्पन्न भएको एक पुलको उद्घाटन तथा केहि नयाँ योजनाहरुको सामुहिक शिलान्यासका लागि प्रचण्ड माडी आउनुहुने भएको हो ।
रौतनी पुल उद्घाटन तथा सडक, पुल र तटबन्धन परियोजनाहरुको सामुहिक शिलान्यासका लागि माडी आउँदा प्रचण्डले पाँच दलिय गठबन्धनका नेताहरुसंग भेटघाट र अगुवा कार्यकर्ता प्रशिक्षण समेत गर्नुहुने भएको छ ।
बुधबार बिहान ८ बजे माडी आइपुग्नुहुने प्रचण्डले दिउँसो १ बजे ५ दलीय गठबन्धनका माडी नगरस्तरीय नेताहरुसंग होटल प्याराडाइजमा सामुहिक भेटघाट गर्नुहुने कार्यक्रम रहेको माओवादी केन्द्र माडी नगरले जनाएको हो ।
त्यसैगरी बिहान ९ बजे, २५ करोड रुपैंया बजेटको १२ किलोमिटर लामो कालोपत्रे सडक र ८ वटा कल्भर्ट निर्माण योजनाहरु भैरवपुर सडक (बरूवा)मा सामुहिक शिलान्यासको कार्यक्रम रहेको छ।
त्यसपश्चात बिहान १० बजे माडी-६, बसन्तपुरमा रौतनी पुलको समुद्घाटन गरी बिहान ११ः३० बजे २० करोड रुपैंया बजेटको टम्टा, परुई, मगुई र चितई खोला तटबन्धन परियोजनाहरुको सामुहिक शिलान्यास माडी ९, कृष्णनगरस्थित टम्टा खोलामा हुने जनाइएको छ ।
माडी क्षेत्र समेट्ने चितवन क्षेत्र नं. ३ बाट प्रतिनिधीसभा निर्वाचन लड्ने सार्वजनिक गरिसक्नुभएका प्रचण्डले पाँचदलीय नेताहरुसंग निर्वाचन लक्षित भेट गर्न लाग्नुभएको बुझिएको छ ।
त्यसपश्चात, दिउँसो २ बजे माओवादी केन्द्र र सो पार्टी सम्बद्ध जनवर्गिय संगठनका अगुवा कार्यकर्ताहरुलाई प्रचण्डले समसामयिक राजनैतिक प्रशिक्षण गर्नुहुने नेकपा (माओवादी केन्द्र) का माडी नगर अध्यक्ष प्रभु प्रसाद महतोले जानकारी दिए ।
