सिरानचाेककाे १, २, ३ र ४ मा कांग्रेसकाे प्यानलै विजयी, ५ मा माओवादीकाे अग्रता
पालिकामा फराकिलाे मतान्तर सहित गुरूङ अगाडि
Surya Baral
– सराेज उपरकाेटी
गाेरखा । सिरानचाेक गाउँपालिका वडा नं १, २, ३ र ४ मा नेपाली कांग्रेसको प्यानल नै विजयी भएको छ । आज बिहान वडा नं. ४ काे मत गणना सकिए संगै नेपाली कांग्रेसले यस वडामा पनि विजय हासिल गरेकाे हाे । नेपाली कांग्रेसका उम्मेदवार भरत हमाल ६८१ मतका साथ विजयी भएका छन् भने उनका निकटतम प्रतिद्वन्द्वी माओवादी केन्द्रका रमेश रेग्मीले ४२२ मत प्राप्त गरेका छन् ।
वडा नं. ३ मा पनि नेपाली कांग्रेसका उम्मेदवार जगदिश ढकालले माओवादी केन्द्रका उम्मेदवार ईश्वरीप्रसाद ढकाललाई फराकिलो मत अन्तरले जितेका छन् । कांग्रेस उम्मेदवार जगदिशले ९६५ मत प्राप्त गरेकाेमा उनका निकटतम प्रतिद्वन्द्वी माओवादीका ईश्वरीप्रसादले ५७८ मत प्राप्त गरेका छन् ।
त्यसै गरि वडा नं. २ मा वडा अध्यक्षका उम्मेदवार खुशीमान गुरूङले ८०९ मतका साथ निर्वाचित भएका छन् । उनका निकटतम प्रतिद्वन्द्वी नेकपा माओवादी केन्द्र उम्मेदवार दन बहादुर गुरूङले ४५० मत प्राप्त गरेका छन् । वडा सदस्यहरू पनि दुवै वडामा नेपाली कांग्रेसका तर्फबाट उम्मेदवार बनेकाहरू सबै विजयी भएका छन् ।
उता साेहि गाउँपालिकाकाे वडा न १ काे वडाअध्यक्षका उम्मेदवार मनिता गुरूङले ४४० मतका साथ विजयी भईन् भने उनका निकटतम प्रतिद्वन्द्वी नेकपा एमालेका उम्मेदवार कुम बहादुर लामाले ३७१ मत प्राप्त गरेका छन् । उक्त गाउँपालिकाकाे वडा नं. ५ मा भने माओवादी केन्द्रका उम्मेदवार ठानेश्वर पाेखरेलले अग्रता कायम राखेका छन् भने उनका निकटतम प्रतिद्वन्द्वी नेपाली कांग्रेसका उम्मेदवारले पछ्याउँदै छन् ।
यस गाउँपालिका अध्यक्षमा पनि नेपाली कांग्रेसका उम्मेदवार ज्ञानेन्द्र गुरूङले सुरूबाटै अग्रता कायम राखेका छन् भने माओवादीका उम्मेदवार नवराज पुडासैनीले पछ्याई रहेका छन् । याे समाचार तयार पार्दा गुरूङले ३०४६ मत र पुडासैनीले १६२८ मत प्राप्त गरेका छन् ।
