भोजपुरमा आगलागी : एक बालिकाको मृत्यु, आमा बुबा घाइते

Surya Baral

 |  प्रकासित मिति : २३ बैशाख २०७९, शुक्रबार ०१:२७

भोजपुर/भोजपुरमा आगलागीमा परेर साढे २ वर्षीया बालिकाको मृत्यु भएको छ । षडानन्द नगरपालिकामा रहेको बोया बजारमा बिहीबार भएको आगलागिमा परेर बालिकाका आमा बुबा घाइते भएका छन् ।
जिल्ला प्रहरी कार्यालय भोजपुरका डीएसपी राजकुमार राईका अनुसार आगलागीमा स्थानीय खेममणि तामाङकी साढे २ वर्षीया छोरी रेश्माको मृत्यु भएको हो । खेममणि तामाङ र उहाँकी श्रीमती मिना तामाङलाई उपचारको लागि वीपी कोइराला स्वास्थ्य विज्ञान प्रतिष्ठान धरान पठाइएको छ ।

यस्तै, आगलागीबाट चार घर जलेर नष्ट भएको छ । खेममणि तामाङको पसलबाट सुरु भएको आगोले उहाँको घरसहित पसल, डम्बर तामाङको २ वटा घर तथा त्यस घरमा रहेको हरि गोले तामाङको किराना पसल, अर्जुन तामाङको घर तथा होटल र त्यही घरमा रहेको सूर्य तामाङको कपडा पसल र टेलर्स समेत जलेर नष्ट भएको प्रहरीले जनाएको छ ।