तत्काल नेपालमा इन्टरनेट सेवा नरोकिने
Surya Baral
काठमाण्डौ/नेपालमा तत्कालको लागि इन्टरनेट सेवा नरोकिने भएको छ ।
नेपाली इन्टरनेट सेवा प्रदायकले विदेशी कम्पनीबाट ब्याण्डविथ किनेको रकम ६ महिनादेखि तिर्न नपाउँदा चुनावको बेला इन्टरनेट काटिने चेतावनी जारी गरेका थिए।
तर इन्टरनेट सेवा प्रदायकहरुको संस्था नेपाल आइस्पान र सञ्चार तथा सूचना प्रविधिमन्त्री ज्ञानेन्द्रबहादुर कार्कीबीच भएको छलफलपछि मन्त्रालयले आइस्पानलाई डलर सिफारिस नरोक्ने सहमति भएको छ । आइस्पानका अध्यक्ष सुधिर पराजुलीका अनसार आज बिदा परेकाले सिफारिस हुन नसक्ने तर भोलिदेखि नै डलर सिफारिसको काम हुने छ ।
‘इन्टरनेट सेवा रोकिनु भनेको देश नै ठप्प हुनु जस्तै हो, सेवा जारी राखेरै समस्याको समाधान गर्नुपर्छ, डलर सिफारिस नरोकौँ ।’ मन्त्रीको भनाइ उदृत गर्दै पराजुलीले भन्नुभयो । नेपालका इन्टरनेट सेवा प्रदायकहरुले भारतको टाटा, एयरटेल र सिफ्फी लगायतका कम्पनीबाट ब्यान्डविथ खरिद गर्दै आएका छन् ।
