स्थानीय तह निर्वाचनका लागि १ लाख ४१२३ जनाले गराए मनोनयन दर्ता
Surya Baral
काठमाण्डौं/आगामी ३० गते हुने स्थानीय तह निर्वाचनमा ७५३ वटा स्थानयि तहबाट ३५ हजार २२१ जनप्रतिनिधी निर्वाचित हुनुपर्ने छ । तर, झण्डै तेब्बर बढी १ लाख ४ हजार १२३ जनाले विभिन्न पदमा मनोनयन दर्ता गराएका छन् ।
सोमबार राति ११ बजे निर्वाचन आयोगले सार्वजनिक गरेको तथ्याङ्कअनुसार सबैभन्दा बढी मधेस प्रदेशमा २४ हजार १४३ जनाले मनोनयन दर्ता गराएका छन् ।
यसपछि प्रदेश १ मा १८ हजार ४९९ जना, लुम्बिनी प्रदेशमा १७ हजार ७२० जना, बागमती प्रदेशमा १७ हजार २२५ जना, सुदूरपश्चिम प्रदेशमा ९ हजार २० जना, कर्णाली प्रदेशमा ८ हजार ९८४ जना र गण्डकी प्रदेशमा ८ हजार ५३२ जनाले मनोनयन दर्ता गराएका छन् ।
निर्वाचन आयोगका प्रवक्ता शालिग्राम शर्मा पौडेलले सर्वाधिक प्रमुख पदमा मधेस प्रदेशमा १ हजार ५ जना र सर्वाधिक कम कर्णाली प्रदेशमा १५९ जनाले मनोनयन दर्ता गराए ।
उपप्रमुखमा पनि सर्वाधिक मधेस प्रदेशमै ४९५ जना र सर्वाधिक कम गण्डकी प्रदेशमा ११५ जना, अध्यक्षमा सर्वाधिक ७५४ जनाले मधेस प्रदेशमै र सर्वाधिक कम सुदूरपश्चिम प्रदेशमा २ सय २४ जनाले मनोनयन दर्ता गराएको निर्वाचन आयोगले जनाएको छ ।
उपाध्यक्षमा पनि मधेस प्रदेशमै बढी उम्मेदवारी परेको छ । त्यहाँ ३८३ जनाले उपाध्यक्षका लागि उम्मेदवारी दिँदा सबैभन्दा कम सुदूरपश्चिम प्रदेशमा १७३ जनाले उम्मेदवारी दिएका छन् ।
यसरी नै वडा सदस्य पदमा सर्वाधिक ३६ हजार ४८८ जनाले मनोनयन दर्ता गराएका छन् ।
वडा अध्यक्षमा २५ हजार ६४ जना, महिला सदस्यमा १७ हजार ४६७ जना र दलित महिला सदस्य १५ हजार ६९७ जनाले मनोनयन दर्ता गराए ।
