एमाले अध्यक्ष केपी शर्मा ओली हुम्ला जाँदैे

Surya Baral

 |  प्रकासित मिति : ४ बैशाख २०७९, आईतवार ०१:३९

सिमकोट/हुम्लाको दुई स्थानमा हुने आमसभालाई सम्बोधन गर्न नेकपा (एमाले) अध्यक्ष केपी शर्मा ओली आज जाँदैछन् ।

आगामी वैशाख ३० गते हुने स्थानीय तहको निर्वाचन लक्षित प्रचार र पार्टीको जिल्लाको अवस्था बुझ्न अध्यक्ष ओली हुम्ला जान लागेको नेकपा (एमाले) जिल्ला पार्टी सचिव तीर्थराज बोहराले बताए ।

जिल्लाको तीन ठाउँमा अध्यक्ष ओलीले भ्रमण गर्ने भएपनि निर्वाचन केन्द्रित दुई ओटा बृहत् आमसभालाई सम्बोधन गर्ने कार्यक्रम तय भएको छ ।

बिहान ११ बजे हेलिकोप्टरबाट हुम्ला पुगेलगत्तै एमाले अध्यक्ष ओली पहिले उत्तरी नाम्खा गाउँपालिकाको लिमि भ्यालीमा प्रस्थान हुन र लिमि क्षेत्रको अवलोकन गर्ने कार्यक्रम रहेको स्थाई कमिटि सदस्य गोरख बहादुर बोगटिले बताए ।

लिमीका बासिन्दासँग भेटेपछि नेपाल र चीनको सीमाना नाम्खा गाउँपालिकाको लिमीमा रहेको लोलुङजोङको हवाई अवलोकन गरेपछि अध्यक्ष ओलीले हुम्ला सदरमुकाम सिमकोटमा आयोजना हुने आमसभालाई सम्बोधन गर्ने कार्यक्रम रहेको छ ।

ओलीले जिल्ला दक्षिण भेगमा रहेको अदानचुली गाउँपालिकाको श्रीनगरमा हुने सभालाई पनि सम्बोधन गर्ने कार्यक्रम छ ।