हतियार देखाई सुनको सिक्री लुटेर भाग्न खोज्ने ३ जना पक्राउ

Surya Baral

 |  प्रकासित मिति : ६ पुस २०७८, मंगलवार ११:२१

नवलपुर/पूर्वी नवलपरासीको गैडाकोटमा हातहतियार देखाई लुटपाट गर्न खोज्ने ३ जनालाई नवलपुर प्रहरीले हातहतियार सहित पक्राउ गरेको छ । सोमबार साँझ पूर्वी नवलपरासीको गैडाकोट नगरपालिका १६ अमरापुरी मा ४७ बर्षीय अनिता श्रेष्ठलाई आफ्नै घरको पसलमा बसिरहेको अवस्थामा ३ जनाको समूहमा आएका व्यक्तिले हतियार देखाई लुटपाट गर्न खोजेको थियो ।
लु ४० प ८४३६ नम्बरको मोटरसाइकलमा आएका ३ जना व्यक्तिहरु आई हतियार देखाई निजको घाटीमा लगाएको सुनको सिक्री लुटेर भाग्न खोज्दा स्थानीयले एक जनलाई घेरा हाली पक्राउ गरेको थियो । स्थानीयले पश्चिम नवलपरासीको रुपौलिया गाउँपालिका १ बस्ने बर्ष २२ को रामबहादुर क्षेत्रीलाई नियन्त्रणनमा लिई गैडाकोट प्रहरीलाई खबर गरेको थियो ।

निजलाई पक्राउ गरेपछि इलाका प्रहरी कार्यालय गैडाकोटका प्रहरी निरीक्षक लक्ष्मी पाण्डे खनालको नेतृत्वमा खटिएको टोलीले गैडाकोट नगरपालिका १४ निवासी ३४ बर्षीय आशिष सुनार र पश्चिम नवलपरासीका सुस्ता गाउँपालिका ९ निवासी २० बर्षीय संजय गुरुङलाई पनि पक्राउ गरेको जिल्ला प्रहरी कार्यालय नवलपुरका प्रहरी निरीक्षक एवम् सूचना अधिकारी सागर पन्थले जानकारी दिए । प्रहरीले लुटपाटमा प्रयोग गरिएको लु ४० प ८४३६ नम्बरको मोटरसाइकल र ४ वटा राउण्ड लोड भएको अवस्थामा रिवल्भर नियन्त्रणमा लिएको छ ।