देशभर बर्षा र उच्च पहाड तथा हिमाली क्षेत्रमा हिमपातको सम्भावना !

Surya Baral

 |  प्रकासित मिति : १ कार्तिक २०७८, सोमबार ०५:२१

काठमाडौं/देशभर तिनदिन बर्षा तथा उच्च पहाडी एवं हिमाली भागमा
हिमपातको संभावना रहेको देखिन्छ । जल तथा मौसम विज्ञान विभाग, मौसम पूर्वानुमान महाशाखाले उच्च पहाडी र हिमाली क्षेत्रमा हिमपातको सम्भावना रहेको बताएको छ । आगामी तीन दिनको मौसम पूर्वानुमान गर्दै महाशाखाले मध्यम हिमपात हुन सक्ने बताएको हो ।
काठमाडौं उपत्यकासहित देशभर शनिबार रातिदेखि मौसममा बदलाब आएको थियो । आज पनि देशभर मौसम बदली हुने महाशाखाले जनाएको छ । त्यस्तै प्रदेश १, २ र वागमती प्रदेशमा मेघगर्जसहित वर्षा हुन सक्नेछ ।
सुदूरपश्चिम, लुम्बिनी र कर्णाली प्रदेशका केही स्थानमा भारी वर्षा हुने महाशाखाले जनाएको छ ।
महाशाखाका अनुसार बंगालको खाँडी तथा भारतमा रहेको न्यून चापीय प्रणाली र पश्चिमी वायु प्रणालीको संयुक्त प्रभाव नेपालमा परेको हो ।
मौसममा बदली भई पानी परेपछि किसानले पाकेको धान भित्र्याउन पाएका छैनन् भने कतिपयले काटेर भित्र्याउन तयार पारेको धान भिजेको छ ।