चाडबाड नजिकीए सँगै नारायणगढ-बुटवल सडकखण्ड मर्मतको काम सुरु
Surya Baral
नारायणगढ/नेपालीहरुको ठूलो पर्व दशैं लगाएतको चाडबाड नजिक आउन थालेसँगै नारायणगढ–बुटवल सडकखण्ड मर्मतको काम सुरु गरिएको नारायणगढ–बुटवल सडक आयोजनाले जनाएको छ ।
सडकको बढी भत्किएका ठाउँहरुमा दुई लेन सडक नै पिच गर्ने तयारी गरेको सडक विस्तारको जिम्मा पाएको चाइना स्टेट कन्स्ट्रक्सनले जनाएको छ ।
नारायणगढ–बुटवल सडकखण्डको गैंडाकोटदेखि दाउन्नेसम्म ६४.४ किलोमिटर खण्डलाई ‘प्याकेज–१’ पूर्वी खण्ड र दाउन्नेदेखि बुटवल चौराहासम्मको ४८.५ किलोमिटर खण्डलाई ‘प्याकेज–२’ पश्चिम खण्ड बनाएर सडक विस्तारको काम थालिएको हो ।
दुबै खण्ड निर्माणको ठेक्का चाइना स्टेट कन्स्ट्रक्सनले पाएको छ । सडक विस्तारका क्रममा पिचको भाग अधिकांश ठाउँमा भत्काइएकाले यो खण्डमा यात्रा निकै कष्टकर हुँदै आएको छ । दुबै खण्डमा निकै सुस्त गतिमा काम भैरहेको छ ।
पूर्वी खण्डका सूचना अधिकारी इन्जिनियर कृष्ण आचार्यले सडक विस्तारको काम निकै ढिला भएको बताए । अहिले ठेकेदार कम्पनीको नयाँ कन्ट्याक्ट म्यानेजर आएपछि कामले गति लिने विश्वास आयोजनाले लिएको सूचना अधिकारी आचार्यले बताए ।
नयाँ कन्ट्याक्टर आएपछि सडक मर्मतको काम थालिएको हो । दशैं अघि सहज यात्राको वातावरण ठेकेदारले बनाउने प्रतिवद्धता जनाएको आचार्यको भनाइ छ ।
पूर्वी खण्डमा अहिलेसम्म जम्मा ८.५ प्रतिशत मात्रै काम भएको छ । इन्जिनियर आचार्यका अनुसार सम्झौताअनुसार यतिबेला ५० प्रतिशतभन्दा बढी काम हुनुपर्ने थियो ।
पश्चिम खण्डमा पनि भत्किएको सडक मर्मतको काम थालिएको परामर्श दाता इन्जिनियर सुसन श्रेष्ठले बताए । उनले दशैं अगाडि मर्मतको काम गरिसक्ने प्रतिवद्धता जनाएको बताए । सो खण्डमा अहिलेसम्म सडक विस्तारको काम जम्मा ९ प्रतिशत मात्रै भएको छ । उनले कोरोनाभाइरस, बर्षा, ठेकेदार कम्पनीको ढिलासुस्तीका कारणले सडक विस्तारले गति लिन नसकेको बताए । अब दशैं–तिहार लगत्तै कामले गति लिने विश्वास आयोजनाले गरेको इन्जिनियर श्रेष्ठले बताए ।
सडक विस्तारको ठेक्का सम्झौता २०७५ पुसमा भएको थियो । सम्झौता अनुसार २०८० साउन २२ गतेसम्म (साढे तीन वर्षमा) निर्माण सकिसक्नुपर्छ ।
एसियाली विकास बैंकको ऋण सहयोगमा बिस्तार गर्न लागिएको नारायणगढ–बुटवल सडक खण्डको लागत १६ अर्ब ९९ करोड ५२ लाख ९५ हजार रूपैयाँ छ । गैंडाकोट–दाउन्ने खण्डको लागत ९ अर्ब १३ करोड १८ लाख ९५ हजार र दाउन्ने–बुटवल खण्डको लागत ७ अर्ब ८६ करोड ३४ लाख रुपैयाँ छ ।
