पहिरोमा पुरिएर पर्वतमा ६ को मृत्यु, २ जना बेपत्ता

Surya Baral

 |  प्रकासित मिति : १८ भाद्र २०७८, शुक्रबार ०४:५७

पर्वत/ लगातारको वर्षापछि विभिन्न स्थानमा खसेको पहिरोमा परेर पर्वतमा शुक्रबार ६ जनाको मृत्यु भएको छ भने दुई जना बेपत्ता भएका छन् ।

कुस्मा नगरपालिका–३ दुर्लुङमा पहिरोले माधव शर्माको घर पुरिँदा उनकी ७५ वर्षकी आमा कौशिला पौडेल, दुई छोरी १६ वर्षकी विमला र ११ वर्षकी विनीता पौडेलको मृत्यु भएको गण्डकी प्रदेश प्रहरी कार्यालय पोखराले जनाएको छ । माधवकी पत्नी ३५ वर्षकी भगवती पौडेल र छोरा ९ वर्षका विनोद पौडेल बेपत्ता भएका छन् ।

त्यस्तै कुस्मा–११ सिल्मीमा मनिलाल पौडेलको घरमा पहिरो खस्दा पाहुना आएका ३८ वर्षीया दुर्गा पौडेल र उनका ६ वर्षीय छोरा गणेश पौडेलको मृत्यु भएको छ ।
पर्वतकै मोदी गाउँपालिका–५ आम्बोटमा घरमाथिबाट आएको पहिरोले पुरिएर ५० वर्षकी फूलमाया थापाको मृत्यु भएको छ ।