प्रधानमन्त्रीलाई पाँच करोडको सुरक्षा उपकरण
पत्रपत्रिकाबाट
प्रधानमन्त्री केपी शर्मा ओलीको सुरक्षाका लागि नेपाल प्रहरीले सर्भिलेन्स गाडीसहितको एलटिई-यापिड कम्युनिकेसन सिस्टम खरिद प्रक्रिया अघि बढाएको छ। नेपाल प्रहरीको बजेटबाट प्रधानमन्त्रीको सुरक्षाका लागि सर्भिलेन्स गाडीसहितको उपकरण खरिद गर्न लागिएको हो।
प्रहरीलाई तत्काल आवश्यक नभएको सो उपकरण खरिदमा प्रहरी महानिरीक्षक ठाकुर ज्ञवाली आफैंले चासो दिएर चाँडै खरिद गर्न निर्देशन दिइसकेका छन्। कोरोना कहरबीच प्रहरी जनशक्ति सुरक्षा उपकरणबिनै फिल्डमा खटिरहेको अवस्थामा ५ करोड खर्चेर उपकरण खरिद गर्न चिनियाँ कम्पनी हुवावेको नेपाल प्रतिनिधि हनी इन्टरप्राइजेज र मोबिलिटी प्रालिलाई छनोट गरिएको छ। सो उपकरणले प्रधानमन्त्रीको सवारीका बेला सर्भिलेन्स गर्नेछ। प्रधानमन्त्रीमाथि आक्रमण भए वा अन्य विपत्ति आइलागे सुरक्षा निकायलाई तुरुन्तै भिडियो रिपोर्ट दिने भएकाले प्रधानमन्त्रीका आइटी विज्ञको सल्लाहमा उपकरण खरिद अन्तिम चरणमान पु¥याइएको हो। त्यसका लागि नेपाल प्रहरीको सूचना तथा प्रविधि निर्देशनालयले फागुन १९ मा बोलपत्र आह्वान गरेको थियो।
त्यति बेला कोरोना महामारी फैलिएपछि आपूर्ति गर्ने कम्पनीसँग पूर्वतयारी बैठक ९प्रि–बिडिङ० बस्न सकेको थिएन। प्रहरीले प्रि–बिडिङ बैठक १८ चैतमा बोलाएको भए पनि त्यति बेला प्रक्रिया रोकिएको थियो। त्यसपछि २० वैशाख र २१ जेठ हुँदै तीन पटक रोकेर २७ जेठमा बैठक राखी ३ असारमा दुईवटा कम्पनी छनोट गरिएको हो। तत्काल जरुरी नभएको सो उपकरण किन्न किन हतार भन्ने प्रश्नको जबाफ प्रहरी नेतृत्वले बताउन चाहेको छैन। प्रहरी प्रवक्ता डिआइजी निरजबहादुर शाहीले आफूलाई यसबारे जानकारी नभएको बताए। ‘प्रहरीको प्रबन्ध शाखाले ठेक्काको काम गर्छ।
कोरोना कहरबीच प्रहरी जनशक्ति सुरक्षा उपकरणबिनै फिल्डमा खटिरहेको अवस्थामा नेपाल प्रहरीकै ५ करोड खर्चेर प्रधानमन्त्रीका लागि सुरक्षा उपकरणसहितको गाडी खरिद प्रक्रिया अन्तिममा पु(याइएको छ।
सूचना प्रविधि निर्देशनालयले आवश्यक भएरै सो प्रविधि ल्याउन लागेको हुनुपर्छ’, उनले भने। यसअघि चीन सरकारले सन् २०१५ मा नेपाल सरकारलाई सो उपकरण निःशुल्क उपहार दिएको थियो। टेलिकमको स्टोर शाखामा रहेको उपकरणलाई नेपाल प्रहरीले ल्याएर राखेको छ। ‘सर्भिलेन्ससहितको सो कम्युनिकेसन सिस्टम अहिले नेपाल प्रहरीलाई आवश्यक छैन। यसबारेमा जानकारी लिनुप¥यो भने पनि प्रधानमन्त्रीका आइटी विज्ञ अस्गर अलीलाई सोध्नुपर्छ’, नेपाल प्रहरीका एक अधिकृतले भने। उनका अनुसार उक्त उपकरण नेपाल भ्रमणमा आएका भिआइपीको सुरक्षाका लागि नेपाल प्रहरीले प्रयोग गरेको थियो, अहिले भने त्यत्तिकै थन्किएको छ।
यति बेला फेरि नयाँ उपकरण खरिद गर्न प्रक्रिया अघि बढाइएको छ। ‘फिल्डमा खटिने प्रहरी कर्मचारीलाई पिपिई, पन्जा, मास्कलगायतका सामान खरिदमा बजेट अभाव देखाएको प्रहरीले ५ करोडको उपकरण तत्काल कुन प्रयोजनका लागि हो भन्ने नखुलाई खरिदको अन्तिम तयारी गरेको छ। यसमा प्रहरी महानिरीक्षक नै लाग्नुभएको छ’, एक प्रहरी अधिकारीले भने।
स्रोतका अनुसार सो उपकरणबारे प्रहरी अधिकृतहरुलाई सामान्य जानकारी पनि नभएपछि बोलपत्र आह्वान गर्दा मापदण्ड निर्धारणसमेत प्रधानमन्त्रीका आइटी सल्लाहकार अलीले गरिदिएको स्रोतले बतायो।
प्रधानमन्त्रीका आइटी सल्लाहकार अस्गर अली र नेपाल प्रहरीका महानिरीक्षक ठाकुर ज्ञवालीको चासोमा उपकरणसहितको गाडी खरिद प्रक्रिया अघि बढेको हो।
गाडीमा जडित एलटिई-यापिड कम्युनिकेसन सिस्टमले सवार व्यक्तिका गतिविधिको भिडियो रेकर्ड गर्नेछ। सुरक्षा थ्रेट मानिएका विश्वका थोरैमात्रै राष्ट्रप्रमुखको सुरक्षाका लागि यस्तो उपकरणजडित सर्भिलेन्स गाडी प्रयोग गरिन्छ। नेपाल पनि चिनियाँ राष्ट्रपति सी चिनफिङ भ्रमणमा आएका बखत सो उपकरण प्रयोग गरिएको थियो।
जानकारका अनुसार सो उपकरण ब्रोड ब्यान्ड प्रविधिमा आधारित छ। त्यही भएर दुर्घटना भएको स्थानबाट रेडियो फ्रिक्वेन्सीमार्फत कमान्ड सेन्टरमा भिडियोसमेत पठाउन मिल्ने भएकाले प्रधानमन्त्रीको सुरक्षा सर्भिलेन्सका लागि प्रयोग गर्न लागिएको स्रोतले जनाएको छ। यो प्रविधि प्रधानमन्त्री कार्यालयमा राष्ट्रिय गौरवका आयोजना मोनिटर गर्न मिल्ने गरी जडान भइसकेको छ। यो खबर आजको नागरिक दैनिक पत्रिकामा छ ।
