अफ्रिकी मुलुक घानामा बस ठोक्किँदा घटनास्थलमै ६० जनाको मृत्यु

 २८ जना घाइते,७ जनाको अवस्था गम्भीर

एजेन्सी

 |  प्रकासित मिति : ९ चैत्र २०७५, शनिबार ०५:३८

एजेन्सी, ९ चैत । अफ्रिकी मुलुक घानामा दुई वटा बस ठोक्किँदा ६० जनाको मृत्यु भएको छ । घानाका प्रहरी अधिकारीहरुले पछिल्लो समयमा सबैभन्दा धेरै मानवीय क्षति भएको दुर्घटना भएको बताएका छन् ।

राजधानी आक्रादेखि ४३० किलोमिटर टाढा पर्ने किटाम्पो शहरमा बस ठोक्किएका हुन् । सवारी साधनहरू गलत ठाउँमा गुडेकाले दुर्घटना भएको स्थानीय प्रहरी प्रमुख जोसेफ अन्तवी ग्यावुले जानकारी दिएका छन् ।

दुवै बसमा ५०र५० जनाभन्दा बढी यात्रु रहेकोमा एकआपसमा ठोक्किएका बसमध्ये एउटामा आगलागीसमेत भएको थियो । कतिपय यात्रुको बसभित्रै जलेर मृत्यु भएको थियो ।

दुर्घटनामा घाइते २८ जनाको उपचार भइरहेको र ७ जनाको अवस्था गम्भीर रहेको अधिकारीहरुले जनाएका छन् ।