माडीमा प्रथम दिवाकर भुषाल स्मृति राष्ट्रिय भलिबल प्रतियोगिता हुने ।
Surya Baral
चितवन,माघ ५ / चितवनको दक्षिण क्षेत्रमा रहेको माडी नगरपालिकामा प्रथम दिवाकर भुषाल स्मृति राष्ट्रिय पुरुष क्लब च्याम्पियनसिप भलिबल प्रतियोगिता–२०७५ हुने भएको छ । राष्ट्रिय भलिबल टिमहरुको सहभागितामा पहिलो पटक आगामी माघ १६ गतेदेखि २० गतेसम्म प्रतियोगिता हुन लागेको हो । युवा, खेलकुद तथा साँस्कृतिक समिति माडी नगरपालिकाको अयोजनामा हुन लागेको सो प्रतियोगितामा त्रिभुवन आर्मी क्लब, महेन्द्र पुलिस क्लब, एपिएफ क्लब, पुर्वान्चल भलिबल क्लब, काभ्रे भलिबल क्लब, गण्डकी प्रदेश भलिबल क्लब, मणिमुकुन्द भलिबल क्लब र चुलो भलिबल क्लब गरी ८ टिमको सहभागीता रहने आयोजकले जानकारी दिएको छ ।
प्रतियोगितामा प्रथम हुने टिमले नगद २ लाख रुपैंया र ट्रफी, दोस्रो हुने टिमले नगद १ लाख र ट्रफी तथा तेस्रो हुने टिमले नगद ५० हजार र ट्रफी प्राप्त गर्ने प्रतियोगिताका संयोजक हरि भुषालले शनिबार भरतपुरमा आयोजित पत्रकार सम्मेलनमा जानकारी दिएका छन् ।
