अन्ततः प्रचण्डले नै उद्घाटन गर्ने भए चितवन महोत्सव २०७५

Surya Baral

 |  प्रकासित मिति : २४ पुस २०७५, मंगलवार ०३:१४

भरतपुर ÷१२ औं चितवन महोत्सवको समुद्घाटनका लागि प्रधानमन्त्री केपी शर्मा ओली आउने कार्यक्रम रद्द भएको छ । स्वास्थ्य प्रतिकुलताका कारण प्रधानमन्त्री आउन नसक्ने भएपछि महोत्सवको समुद्घाटन कार्यतालिका फेरिएको छ । चितवन महोत्सव २०७५ को समुद्घाटन पूर्व प्रधानमन्त्री पुष्पकमल दाहाल प्रचण्डले गर्ने भएकाछन् । यस अघि चितवन महोत्सव २०७५ को समुद्घाटन पूर्व प्रधानमन्त्री पुष्पकमल दाहाल प्रचण्डले नै गर्ने मुल आयोजक समितिको तयारी थियो । तर पूर्व प्रधानमन्त्री दाहालकै संयोजनकारी भूमिकामा प्रधानमन्त्री ओलीले महोत्सवको १२ औं संस्करण समुद्घाटन गर्ने तयारी गरिएकोमा स्वास्थ्यकै कारण तालिका फेरी बदल्नुपरेको महोत्सव मूल आयोजक समिति संयोजक सहनलाल प्रधानले बताए ।
महोत्सवको अन्तिम तयारीका लागि आइतबार बसेको मूल समितिको बैठकमा समेत महोत्सव समुद्घाटनका लागि प्र्रधानमन्त्री केपी ओली नै आउने भनिएको थियो । प्रधानमन्त्री ओलीको स्वास्थ्य प्रतिकुलतालाई ख्याल गर्दै उद्घाटन सत्रलाई २ घण्टा भित्र सक्ने तयारी थियो । तर सोमबार प्रधानमन्त्रीको स्वास्थ्यमा आएको प्रतिकुलताका कारण सहभागि हुन नसक्ने खबर सचिवालयबाट आएकाले परिवर्तन गरिएको मूल आयोजक समिति संयोजक प्रधानले प्रष्ट्याए ।